A Unión Europea, a través da iniciativa Nova Bauhaus Europea (NBE), anunciou dúas convocatorias dirixidas a proxectos innovadores que teñan a sustentabilidade e a inclusión como bandeira. Estas iniciativas buscan premiar aqueles proxectos que contribuíron a transformar comunidades e espazos en sintonía cos valores do Pacto Verde Europeo, proporcionando apoio económico e visibilidade ás ideas máis inspiradoras
Por un lado, os premios “Impulso para os Pequenos Municipios” están deseñados específicamente para localidades con menos de 20.000 habitantes. Esta convocatoria busca apoiar e visibilizar proxectos que materialicen os principios da NBE (sustentabilidade, inclusión e estética) e centrados na rexeneración de espazos públicos, na conservación do patrimonio cultural e na promoción de solucións de vivenda asequibles. Outorgaranse vinte galardóns de 30.000 euros cada un, ademais de apoio na promoción dos proxectos seleccionados. Os proxectos que queiran postularse a este premio en concreto poderán facelo ata o 14 de febreiro de 2025 a través da plataforma oficial da NBE. Un xurado externo seleccionará aos gañadores, garantindo unha representación xeográfica e socioeconómica diversa dentro da Unión Europea.
Por outro lado, os Premios Xerais Nova Bauhaus Europea 2025 céntranse en catro categorías temáticas que abordan transformacións chave: reconexión coa natureza, recuperación da sensación de pertenza, atención aos lugares e ás persoas máis vulnerables, e fomento de ecosistemas industriais circulares. Este premio inclúe dous apartados: “Campións da NBE”, orientado a proxectos completados que demostren resultados tangibles, e “Estrelas Emerxentes da NBE”, dirixido a conceptos innovadores desenvolvidos por mozos menores de 30 anos.
Estes premios económicos varían desde 10.000 euros para finalistas ata 30.000 euros para gañadores, con galardóns adicionais para solucións de vivenda asequible. Ademais, poderán participar proxectos e conceptos implementados na Unión Europea, os Balcáns Occidentais e Ucraína. A selección inclúe unha avaliación por expertos, complementada cunha votación pública.
Ambas convocatorias reflicten o compromiso da Unión Europea cunha transición ecolóxica transformadora, destacando proxectos que inspiren e marquen a diferenza nas súas comunidades. Tanto os pequenos municipios como o talento mozo teñen agora unha oportunidade única para recibir apoio, demostrar o seu potencial e contribuír a un modelo de desenvolvemento sostible e inclusivo.