As embarcacións foron sometidas a traballos de revisión e mellora antes do inicio da nova tempada das rutas fluviais, que arrincará o 1 de abril
Os catamaráns da Deputación lucense xa están preparados para iniciar unha nova tempada de percorridos turísticos na Ribeira Sacra. A responsable da área de Réxime Interior, Promoción do Territorio e Turismo, Pilar García Porto, anunciou que as embarcacións acaban de ser sometidas a unha serie de traballos de revisión, arranxo e mellora interior. A intervención, segundo afirmou, tivo o obxectivo de que os catamaráns «estean en perfectas condicións e cumpran con todas as garantías de calidade e seguridade».
A nova tempada de percorridos polas rutas do Sil e o Miño comezará o 1 de abril, coincidindo co inicio da Semana Santa. Desde o pasado día 7 pódense efectuar reservas para viaxar nos catamaráns a través da web reservas.rutasembalses.es. Durante a primeira semana “precisou no seu momento o organismo provincial” xa se rexistraron máis de 7.500 reservas, das que unhas 6.300 corresponden á ruta do Sil.
Entre o 1 e o 9 de abril ofreceranse percorridos de forma ininterrompida en horario de mañá e tarde. Durante o resto do mes haberá viaxes de mércores a domingo na ruta do canón do Sil e os fins de semana na do Cabo do Mundo, que discorre polo Miño. En maio manterase este calendario, aínda que tamén haberá servizo en ambas as rutas o primeiro luns do mes “con motivo do Día do Traballo” e o 17 de maio, con ocasión do Día dás Letras Galegas.
Doutra banda, na ruta do canón do Sil haberá tres percorridos diarios “un de mañá e dous de tarde” durante os meses de xuño, xullo, agosto e setembro. A partir do 1 de outubro haberá viaxes de mércores a domingo e en novembro, os fins de semana. O 1 de novembro “con motivo da festividade de Santos” haberá servizo en horario de mañá e tarde.
En canto á ruta do Miño, en xuño haberá percorridos de mércores a domingo, con tres frecuencias horarias. Durante os meses de xullo, agosto e setembro, o servizo turístico funcionará ao longo de toda a semana. Desde o 1 de outubro até a ponte festiva de decembro só haberá viaxes os fins de semana, coa excepción das pontes do 12 de outubro “no que se ofrecerá servizo de mércores a domingo” e de Todos os Santos, no que se poderá viaxar o 1 de novembro.