O Comité das Rexións ten como función presentar os puntos de vista rexionais e locais sobre a lexislación europea, a través de informes sobre as propostas da Comisión
O Comité das Rexións iniciou onte o seu novo mandato para 2020-2025, sendo elixidos os órganos representativos do Comité, así como das delegacións nacionais dos diversos estados membros. A delegación portuguesa conta con doce representantes - Goberno Autónomo dos Azores e de Madeira e os presidentes das Cámaras de Lisboa, Aveiro, Mafra, Portimão, Póvoa de Varzim, Camiña, Braga, Viana do Castelo, Lagoa (Azores) e Sintra, e vai ter como presidente ao alcalde de Lisboa, Fernando Medina, sendo elixido vicepresidente o alcalde de Viana do Castelo, José Maria Costa.
O Comité das Rexións é un órgano consultivo que representa as entidades locais e rexionais da Unión Europea no que o alcalde vianense está integrado desde xaneiro de 2014. Ten como función presentar os puntos de vista rexionais e locais sobre a lexislación europea, a través de informes sobre as propostas da Comisión. Actualmente conta con 353 membros de todos os países da UE. A Comisión, o Consello e o Parlamento consultan o Comité das Rexións antes da toma de decisións sobre cuestións relativas á administración local e rexional (por exemplo, sobre política de emprego, ambiente, educación ou saúde pública), polo que este nomeamento do alcalde vianense para a vicepresidencia asume unha relevante importancia.
A delegación portuguesa identificou como prioridades para este mandato o orzamento europeo e a política de cohesión, a Axenda Urbana, a Axenda Verde Europea e a Presidencia Portuguesa da Unión Europea no primeiro semestre de 2021.