Viana do Castelo acollerá o Centro de Interpretación do Eixo Atlántico

O edificio das antigas residencias femininas de estudantes, na avenida Conde Carreira, será rehabilitado para crear un centro cultural sobre a historia do Eixo Atlántico

Viana do Castelo, presidencia e Capital da Cultura do Eixo Atlántico 2025, inicia a construción do Centro de Interpretación do Eixo Atlántico. Este novo espazo cultural, educativo e artístico estará situado no edificio das antigas residencias femininas de estudantes, na avenida Conde Carreira. O inmoble será rehabilitado conservando a súa arquitectura orixinal e adaptándoo cun deseño moderno, funcional e respectuoso coa contorna urbana e paisaxística.

O novo deseño do edificio contará cunha exposición permanente sobre a historia do Eixo Atlántico, con contidos interactivos, e unha sala audiovisual onde se presentarán os seus principais proxectos, accións e redes de cooperación. Tamén se poderá visitar a exposición antolóxica da Bienal de Pintura, coas obras gañadoras das catorce edicións, que residirá de forma permanente. O percorrido rematará cunha sala dedicada á historia do Eixo Atlántico, desde a súa fundación en Viana do Castelo en 1992 ata a súa consolidación, ao longo destes 33 anos, como o sistema urbano transfronteirizo máis antigo e dinámico de referencia na Unión Europea.

No exterior, o centro disporá de varios espazos abertos ao público: unha zona cultural para actividades e exposicións ao aire libre, unha zona de degustación gastronómica con produtos de Galicia e do Norte de Portugal, un espazo de eventos cun pequeno palco para espectáculos e un xardín con plantas autóctonas do noroeste peninsular, concibido con fins pedagóxicos e científicos.

Con esta iniciativa, o Eixo Atlántico reforza o seu compromiso coa cultura e o coñecemento, consolidando a Viana do Castelo como unha referencia da Eurorrexión. A Cámara Municipal asumirá a restauración do edificio e o Eixo Atlántico achegará os seus contidos.