A reunión celebrouse na Facultade de Ciencias da Información do Campus de Pontevedra
Co propósito de achegar os cambios e novidades que estánse a producir na contratación pública, os técnicos dos diferentes concellos de Galicia e do Norte de Portugal, integrados no Eixo Atlántico, asistiron a un seminario de formación sobre os novos retos e horizontes dos contratos públicos. A xornada contou coa da Universidade, e se celebrou na Facultade de Ciencias Sociais e da Comunicación, de Pontevedra.
Cun peso económico que representa a preto do 20% do Produto Interior Bruto da Unión Europea, a contratación pública pode ser unha ferramenta para promover actuacións que contribúan á protección do medio ambiente, á igualdade entre mulleres e homes ou ao fomento da innovación.
Esta é a idea na que se asenta a chamada contratación pública estratéxica, que a UE promoveu a través de diferentes directivas que, a súa vez, están a mudar a lexislación dos diferentes estados.
Máis de 40 persoas, entre persoal dos diferentes municipios que integran o Eixo e alumnado do grao en Dirección e Xestión Pública, asisten nesta xornada a un curso impartido polos profesores da Área de Dereito Administrativo da Universidade Patricia Valcárcel e Rafael Fernández Acevedo, xunto coa docente da Universidade do Minho Cláudia Viana e a asesora xurídica do Eixo Atlántico, Carmen López. O vicerreitor do campus, Juan Manuel Corbacho; o alcalde de Pontevedra, Miguel Anxo Fernández Lores; o secretario xeral do Eixo Atlántico, Xoán Vázquez Mao, e a vicedecana Rosa Ricoy presidiron o acto de apertura deste seminario, no que Corbacho agradeceu ao Eixo que optase por CCSS e da Comunicación, “onde se imparte o único grao en Dirección e Xestión Pública do Sistema Universitario Galego, con modalidade presencial e semipresencial” para esta actividade formativa. “A implantación das directivas europeas implica unha serie de desafíos en materia de contratación para os que non toda a xente ten ferramentas”, engadiu Vázquez Mao, nun acto no que Ricoy destacou o papel que esta pode xogar “como instrumento que oriente o mercado cara comportamentos socialmente responsables e cara a dinamización da actividade económica”, mentres que Fernández Lores puxo de relevo a importancia de xerar un debate sobre “unha lexislación feita para as multinacionais”, que prexudica ao seu xuízo ás pequenas e medianas empresas.