No marco da visita que unha delegación brasileira está a realizar a Galicia e ao Norte de Portugal organizada por Viana do Castelo e o Eixo Atlántico
O presidente da Asociación Brasileira de Municipios, Ary Vanazzi, reuniuse esta mañá co presidente da Fegamp e do Eixo Atlántico, Alfredo García, para establecer un programa de cooperación entre municipios de Europa e de América Latina. Esta reunión enmárcase na visita que unha delegación brasileira está a realizar a Galicia e ao Norte de Portugal organizada por Viana do Castelo e o Eixo Atlántico. Na reunión participou tamén o vicepresidente da Cámara Municipal de Viana do Castelo, Vitor Lemos, e o secretario xeral do Eixo, Xoán Vázquez Mao.
O ano pasado o secretario xeral do Eixo Atlántico foi convidado polo Observatorio de Fronteiras Uruguai Brasil a participar en reunións conxuntas e impartir senllas conferencias na localidade uruguaia de Rivera e na brasileira de Santana do Livramento. Posteriormente, en maio deste ano foi convidado a visitar a localidade brasileira de São Leopoldo no estado fronteirizo de Rio Grande do Sul, viaxe que realizou no marco dun programa de intercambio en materia de tecnoloxía ambiental con Viana do Castelo. Como resultado daquelas reunións, unha delegación brasileira atópase esta semana en Viana do Castelo, visitando diversas experiencias ambientais e urbanas.
Na reunión de hoxe os representantes municipais, ademais de intercambiar información sobre o proceso de integración de Mercosur e o proceso de construción europea, falaron da Axencia de Ecoloxía Urbana do *Eixo Atlántico, de Políticas Urbanas, Cooperación Transfronteiriza e proxectos de sustentabilidade e innovación que poidan desenvolver conxuntamente financiados pola Comisión Europea.
O ano próximo, en Montevideo, entra en funcionamento o Parlamento de Mercosur, o que dará un impulso ao proceso de integración de América Latina, proceso no que un dos eixos prioritarios é a cooperación transfronteiriza; e é precisamente este ámbito da cooperación onde entidades como o Observatorio de Fronteiras e Bripaem (Bloque Rexional de Intendentes, Prefeitos, Alcaldes e Empresarios do Mercosur), que integra máis de 400 cidades de Brasil, Uruguai, Paraguai e Ecuador e que estiveron de visita oficial no Eixo Atlántico hai un mes, solicitaron que esta asociación lles dea apoio e asesoramento neste proceso.