A publicación recolle os principais recursos turísticos do municipio e recomenda medidas para reforzar o sector: Informe de Turismo: Vilalba
O Eixo Atlántico presentou en Vilalba o informe “Actividades, propostas e recomendacións para o desenvolvemento turístico de Vilalba”, unha publicación que analiza o potencial turístico do municipio e propón liñas de actuación para reforzar o sector nos próximos anos. A presentación contou coa presenza da alcaldesa de Vilalba, Marta Rouco; a autora do estudo, Montserrat Cruz; e Vânia Oliveira, directora do Departamento de Programas e Cooperación do Eixo Atlántico. 
O estudo foi elaborado por un equipo da Universidade de Vigo integrado por María Montserrat Cruz González, Francisco Javier Sánchez Sellero e Vanessa María Suárez Porto. A obra, dispoñible en formato impreso e dixital, foi cofinanciada polo FEDER a través do programa POCTEP.
Unha visión completa do potencial turístico
O informe recolle os principais atractivos de Vilalba, entre os que destacan o Camiño Norte, a Charca do Alligal, a área da Madalena, os seus xacementos castrexos, o patrimonio relixioso e as Torres de Vilalba, así como as paisaxes da Terra Chá e da Reserva da Biosfera Terras do Miño.
O documento analiza tamén a situación actual da actividade turística, tanto na oferta como na demanda, e identifica os elementos que cómpre reforzar para que o municipio avance cara a un modelo máis competitivo e sostible.
Recomendacións prioritarias
Entre as propostas incluídas no estudo figuran:
- Impulsar un turismo sustentable.
- Mellorar a coordinación local do sector.
- Desenvolver novos produtos turísticos.
- Reforzar a atención ás persoas peregrinas do Camiño Norte.
- Avanzar na dixitalización.
- Promover o turismo gastronómico e de natureza.
Un instrumento para orientar o futuro
O informe nace co obxectivo de servir de apoio ao Concello e ao sector turístico de Vilalba para planificar actuacións futuras e aproveitar as oportunidades que ofrece o territorio. O Eixo Atlántico destacou que esta publicación contribúe a fortalecer o desenvolvemento económico e social dos municipios que forman parte da eurorrexión.