Xoán Vázquez Mao, secretario xeral do Eixo Atlántico, interveu na apertura da conferencia «Sustainable Tourism Models for New Realities», celebrada en Cognac
O Eixo Atlántico participou este 4 de novembro na conferencia europea «Sustainable Tourism Models for New Realities», organizada no marco do proxecto POST (Polycentric Sustainable Tourism), financiado polo programa Interreg Atlantic Area. O encontro reuniu no Château de Bouteville, preto de Cognac (Francia), profesionais do sector turístico, representantes das administracións públicas, investigadores e outros axentes de Francia, Portugal, Irlanda e España. 
O secretario xeral do Eixo Atlántico, Xoán Vázquez Mao, participou na sesión inaugural xunto con representantes institucionais e responsables europeos, en representación da entidade, que é socia líder do proxecto POST.
A conferencia permitiu intercambiar experiencias e analizar novas fórmulas para avanzar cara a un turismo máis equilibrado, resiliente e sostible no espazo atlántico, prestando especial atención ao turismo policéntrico e á súa capacidade para distribuír mellor os fluxos de visitantes, ampliar as oportunidades económicas a outros territorios e conectar destinos urbanos, rurais, costeiros e de interior.
Durante a xornada presentáronse tamén os principais resultados do proxecto POST e a súa «Strategy for a New Tourism Model: Polycentric Sustainable Tourism», unha estratexia que recolle recomendacións para diversificar a oferta turística e favorecer un desenvolvemento territorial máis equilibrado.
A participación do Eixo Atlántico nesta iniciativa europea enmárcase no seu compromiso coa cooperación entre Galicia e o norte de Portugal e co desenvolvemento de modelos turísticos que poñan en valor os recursos dos distintos territorios, contribúan a reducir a estacionalidade e xeren oportunidades máis alá dos destinos tradicionalmente máis visitados.