El Eixo Atlántico liderou onte un encontro dos nove socios do proxecto EURE, no que foi aprobado un documento que subliña a importancia de incluír a sustentabilidade ambiental na política urbana das cidades no próximo marco financeiro 2021-2027
18 de febreiro de 2021. O Eixo Atlántico liderou onte un encontro dos nove socios do proxecto EURE, no que foi aprobado un documento que subliña a importancia de incluír a sustentabilidade ambiental na política urbana das cidades no próximo marco financeiro 2021-2027. O proxecto EURE, liderado polo Eixo, centra o seu traballo no Fondo Europeo de Desenvolvemento Rexional (Feder) para estudar como se está a utilizar este fondo no eido do desenvolvemento da política urbana e como se poden optimizar os seus recursos nas 480 cidades onde viven actualmente máis de 10 millóns de habitantes.
Tendo en conta que cara 2050 máis do 80% da poboación europea vivirá en zonas urbanas, o Eixo Atlántico e todos os socios de EURE consideran que estas zonas deben dar resposta axeitada e eficiente aos desafíos económicos, ambientais e sociais da época actual. Entendendo a sustentabilidade medioambiental como un marco de referencia transversal da política europea de cohesión, e non só como un elemento de salvagarda dos recursos naturais e diante do cambio climático, propoñen un proceso de “acordos verdes” no eido económico e de desenvolvemento no que deben participar tamén as autoridades locais e os actores empresariais.
O informe aprobado polos socios do proxecto EURE, que se presentará nos vindeiros días baixo o título Por unha calidade de vida mellor e sustentable nas cidades europeas, recolle as razóns polas que a UE debe seguir intervindo nas zonas urbanas e tamén como os actores destas zonas perciben a intervención europea, cunha análise da mesma en áreas como a transición enerxética, a economía circular, a rexeneración urbana, a mobilidade urbana sustentable, a inclusión social ou a adaptación das urbes ao cambio climático, entre outras.
O informe inclúe, ademais, 15 recomendacións dirixidas á Comisión Europea para que esta as teña en consideración no próximo regulamento de financiación dos fondos estruturais ata 2027. Estas recomendacións cubren fundamentalmente catro áreas: como debería ser a futura política urbana da UE; recomendacións para cada temática sectorial de política urbana; e cuestións relacionadas co seu financiamento e gobernabilidade.
O proxecto EURE - Eficiencia das Políticas Ambientais Urbanas para Mellorar a Eficiencia dos Recursos é un proxecto financiado por Interreg Europe e desenvolvido por:
- Eixo Atlántico (ES), líder do proxecto
- Agency for the Development of the Empolese Valdelsa (Italia)
- Alba Iulia Municipality (Rumanía)
- Lubelskie Voivodeship (Polonia)
- Department of Coordination of European Projects of Pilsen City (República Checa)
- Nicosia Development Agency (Chipre),
- Atlantic Cities (Francia)
- Riga City Council (Letonia)
- ACR+ Association of Cities and Regions for sustainable Resource management (Bélxica)
Máis información:
www.interregeurope.eu/eure | Este enderezo de correo está a ser protexido dos robots de correo lixo. Precisa activar o JavaScript para velo. | @EureInterreg | Subscrición á newsletter