Concellos de Galicia e do Norte de Portugal únense para coñecer proxectos innovadores na loita contra o cambio climático
O Eixo Atlántico celebrou en Braga o VII Seminario de Intercambio de Experiencias no eido da Sustentabilidade Urbana, un evento que reuniu representantes municipais, técnicos e responsables de políticas ambientais para compartir solucións na loita contra o cambio climático. 
O evento tivo lugar no espazo GNRation e foi inaugurado por Ricardo Rio, presidente da Cámara Municipal de Braga; Sílvia Costa, concelleira da Cámara Municipal da Póvoa de Varzim e presidenta do Grupo Temático de Sustentabilidade Urbana do Eixo Atlántico; e Rita Fidalgo, secretaria xeral adxunta do Eixo Atlántico.
Alfonso Alcolea, responsable das políticas de medio ambiente urbano na Dirección Xeral de Medio Ambiente da Comisión Europea, presentou as principais iniciativas europeas neste ámbito, como o Pacto Cidade Verde e o Premio Capital Verde Europea.
A sesión incluíu a presentación de proxectos locais exemplares. Dalila Sepúlveda, directora do Departamento de Medio Ambiente e Sustentabilidade da Cámara Municipal de Guimarães e membro da Dirección Executiva da Unidade de Misión Guimarães Capital Verde Europea 2026, presentou a estratexia municipal de Guimarães para a sustentabilidade e a resiliencia climática. Tiago Lopes, coordinador de proxectos estratéxicos para a acción climática e a transición enerxética da Cámara Municipal de Matosinhos, presentou o Laboratorio de Cidadanía para a Transición Climática.
Así mesmo, Pedro Teiga, enxeñeiro ambiental e consultor especializado en rehabilitación fluvial, mostrou o proxecto de renaturalización do Río Este, promovido pola Cámara Municipal de Braga. Carla Gonçalves, directora executiva do Centro Climático do Municipio da Póvoa de Varzim, compartiu a experiencia do municipio na promoción da resiliencia baseada na adaptación do territorio.
O seminario rematou cun debate aberto, moderado por Sílvia Costa, onde se destacou a importancia da colaboración transfronteiriza e do intercambio técnico para facer fronte ao cambio climático nas cidades do Eixo Atlántico.
