Unha iniciativa impulsada polo Eixo Atlántico, no marco de Interreg SUDOE, que aposta por novos modelos de prevención de incendios e desenvolvemento rural sostible
As dependencias do Viveiro de Empresas do Barco de Valdeorras, albergaron a presentación do proxecto S1/2.4/E0022 USE4FOREST, impulsado polo Eixo Atlántico dentro do programa europeo Interreg Sudoe 2021-2027, que busca desenvolver unha experiencia piloto de “cortalumes produtivos” na parroquia de Alixo, que servirá como ferramenta para a prevención de lumes forestais.
No marco do proxecto, levaranse a cabo un conxunto de tarefas de xestión integral de parcelas forestais para a súa recuperación e a posta en marcha de novos modelos de aproveitamento micolóxico e silvícola.
Co obxectivo de implementar os mencionados modelos, que permitirán a restauración e consolidación do terreo, así como a formación de novos postos de traballo que contribúan á fixación da poboación e revalorización do territorio, o Concello do Barco anunciou a posta a disposición dun centro de formación que ofreza os recursos formativos necesarios para que todos os interesados adquiran a capacitación laboral necesaria que lles permita realizar os diferentes aproveitamentos forestais.
Entre as actividades formativas previstas figuran módulos de micoloxía, repoboación de castiñeiros, cultivo de prantas aromáticas e medicinais, apicultura ou silvopastoreo, ademais dun curso transversal de emprendemento e revalorización rural. Dita formación está aberta tanto a persoas que dispoñan de terreos, como a quenes queiran iniciarse neste tipo de actividades.
Para levalas a cabo, o proxecto conta co apoio da Deputación de Ourense na adquisición de ferramentas, subministros e material agrícola e forestal, ademais da xestión do servizo de labores de acondicionamento e preparación dos terreos cedidos por este Concello.
No acto de presentación, ademais do alcalde do Barco, Aurentino Alonso, interveu o deputado de Dinamización do Medio Rural da Deputación de Ourense, Xosé Miguel Pérez Blecua, e o responsable do Departamento Agrotech de Sinerxia, Pablo Condo.