A nova guía turística,Expocidades e o documento sobre o Camiño Portugués de Santiago, algúns dos temas tratados
O Carballiño foi o anfitrión da reunión do Grupo Temático de Turismo do Eixo Atlántico que abordou, entre outras cuestións, a nova guía turística, o modelo das próximas edicións de Expocidades e o documento elaborado sobre o Camiño Portugués de Santiago.
O Grupo estudou o punto de situación da nova guía turística e o cronograma do seu desenvolvemento. A temática desta guía está orientada a coñecer a historia da eurorrexión. En canto á Mostra de Turismo das Cidades de Eixo Atlántico, Expocidades, o GT fixo unha análise das edicións anteriores para decidir o formato da exposición para as súas próximas edicións.
Finalmente, realizaron unha análise do documento elaborado pola Xunta de Galicia sobre o Camiño Portugués de Santiago para que as cidades incorporen os seus comentarios ao citado documento. Trátase dunha xustificación histórica do Camiño Portugués de Santiago na zona Norte de Portugal a falta da zona transmontana, que será realizado este ano, xunto aos trazados de camiño da Costa e do Camiño Interior.