Gondomar (Portugal) acolle a XV edición da Bienal de Pintura do Eixo Atlántico

A exposición de arte poderá visitarse do 7 de febreiro ao 31 de marzo de 2026 no Auditorio Municipal de Gondomar (Portugal). Consulte aquí o catálogo

Gondomar é a segunda parada da exposición itinerante da XV Bienal de Pintura do Eixo Atlántico. Durante case dous meses, os visitantes poderán gozar de 28 obras de artistas de Galicia e do Norte de Portugal.

Obras premiadas da XV Bienal de Pintura do Eixo Atlántico

🥇 Primeiro Premio

Obra: A liberdade de Ser
Técnica: Acrílico e spray de alta temperatura sobre paneis de luz LED, MDF
Autor: Acácio Viegas (Viana do Castelo, 1976)

🥈 Segundo Premio

Obra: Rompiendo límites
Técnica: Pintura acrílica sobre táboa (obra bidimensional)
Autor: Javier Pena (Sarria, 1947)

🏅 Premio Novos Talentos Luso-Galaicos

Obra: O que vin
Técnica: Óleo sobre lenzo
Autor: Afonso António (Lousada, 2004)

Un xurado presidido por Gosia Trebacz

A artista multidisciplinar Gosia Trebacz (Cracovia, 1971), con máis de trinta anos de traxectoria en Galicia e unha sólida presenza internacional, presidiu o xurado desta XV edición. Completaron o panel avaliador Sara Pérez Bello (Xunta de Galicia), Patricia Oliveira (IPDJ), João Ribeiro da Silva e Tito Senna, gañador da edición anterior.

Trebacz destacou que a Bienal é “un trampolín para que artistas emerxentes e consolidados amosen as súas obras na nosa fermosa esquina atlántica, fomentando o intercambio e o diálogo entre Galicia e o Norte de Portugal”.

Creada en 1997, a Bienal de Pintura do Eixo Atlántico consolidouse como un referente cultural transfronteirizo, impulsando a creación artística e a cooperación entre Galicia e o Norte de Portugal. A XV edición conta coa colaboración da Xunta de Galicia, da Comissão de Coordenação e Desenvolvimento Regional do Norte, I.P., e do Instituto Português do Desporto e Juventude, I.P.

Tras a súa estadía en Gondomar, a exposición percorrerá durante 2026 os seguintes municipios do Eixo Atlántico:

• Abril – Peso da Régua
• Maio – Ribeira
• Xuño – Vilalba
• Xullo – Vila Real
• Agosto – Bragança
• Setembro – Monforte de Lemos
• Outubro – Barcelos
• Novembro – Felgueiras
• Decembro – Carballo