Do 2 ao 4 de maio, na Praza da Vila, celebrarase a oitava edición da Feira de Turismo do Eixo Atlántico, coa participación de case trinta municipios e entidades de Galicia e o Norte de Portugal
O Grupo Temático de Turismo do Eixo Atlántico reuniuse en Sarria para avanzar na organización da VIII edición de Expocidades. Durante a reunión, presidida por Miguel Abrunhosa, presidente do Grupo Temático de Turismo do Eixo Atlántico e concelleiro da Cámara Municipal de Bragança, rendiuse un emotivo homenaxe á alcaldesa de Lugo e vicepresidenta da mesa da Asemblea, falecida o pasado 1 de marzo. 
A concelleira de Turismo do Concello de Sarria, Reyes Abella, presentou a programación nun encontro cos representantes dos municipios e entidades participantes. A feira contará con visitas guiadas, catas de viños, concertos, exposicións e talleres durante o primeiro fin de semana de maio. Expocidades inaugurarase o venres 2 de maio coa actuación da Banda de Música de Sarria. Nesta primeira xornada tamén se presentará unha exposición dedicada aos carteis publicitarios de Matías López, pioneiro no marketing e famoso chocolatero sarriano, co motivo do 200º aniversario do seu nacemento.
Como é habitual, Expocidades ofrecerá varias actividades que os municipios e entidades participantes levarán a Sarria, tales como degustacións enogastronómicas, talleres, artesanía en vivo, entre outras. Sarria tamén preparou un amplo programa para animar todo o fin de semana do 2 ao 4 de maio. Cada día estará dedicado a un espazo territorial no que o Eixo se insire: o venres a Galicia, o sábado a Europa e o domingo a Portugal.
A concelleira destacou algúns dos eventos máis relevantes que os asistentes poderán disfrutar durante o primeiro fin de semana de maio. Ademais da inauguración coa Banda de Música de Sarria, ofreceranse tres visitas guiadas ao longo do fin de semana. Estas visitas abordarán o Camiño Francés, as antigüedades e a figura de Matías López, e serán dirixidas por expertos locais como Silvia Mondelo. O sábado 3 de maio, os visitantes poderán participar nunha cata exclusiva de viños galegos e portugueses, con enólogos de ambas as rexións, nun evento para un grupo reducido de 100 persoas.
Para o público infantil, haberá talleres de chocolate, maxia e a creación de instrumentos con elementos naturais, mentres que os adultos poderán desfrutar dun taller de baile tradicional galego. A música será outra das grandes protagonistas de Expocidades, con concertos de diferentes xéneros, incluído un tributo a ABBA, a banda local Louband e o grupo sarriano Clarisaxos, que poñerá o broche final á feira. Ademais, a xornada do domingo estará dedicada a Portugal, cunha sesión vermú de fados a cargo de Iria Estévez.
Durante o fin de semana do 2 ao 4 de maio, Sarria tamén contará con actividades deportivas, como a carreira de obstáculos Pretorian Race, que atraerá a deportistas de toda a rexión, e un rally de coches clásicos organizado polo club Clásic@s Sarria.
Expocidades é un evento organizado polo Eixo Atlántico que promove o turismo de proximidade e o intercambio cultural entre Galicia e o norte de Portugal. Ao longo do evento, os visitantes poderán explorar a riqueza cultural, histórica e gastronómica dos municipios do Eixo Atlántico, unindo as dúas rexións nun espazo de intercambio e desfrute.