27 alumnos de 5º e 6º de Primaria do CEP de Carreira e CEIP de Artes viaxan a Vila Real co fin de promover, entre os estudantes e docentes, o coñecemento do seu municipio e do patrimonio cultural, natural e inmaterial do Eixo Atlántico
No Agrupamento de Escolas Diogo Cao, os nenos e nenas de Ribeira e Vila Real realizaron actividades de robótica, unha ruta polos Pasadizos do Corgo e visitaron o Palacio de Mateus e o Centro de Ciencia. No mes de maio, serán os estudantes de Vila Real os que viaxe a Ribeira. Así mesmo, o CEIP de Frións de Ribeira participarán nun intercambio con Braga. 
O alumnado viaxou acompañado do seu profesorado e da técnica municipal de Normalización Lingüística do Concello, Alicia Padín. Así, a comitiva de Ribeira foi recibida no Salón Nobre dá Cámara Municipal de Vila Real polo vicepresidente da Cámara e vereador de Educación, Alexandre Favaios; e polo director de Agrupamento de Escolas Diogo Cao, Armando Felix.
Trátase do primeiro intercambio desta edición na que, 250 nenos e nenas de 7 cidades da Eurorrexión gozarán deste programa. Os municipios participantes son: A Coruña, Braga, Guimarães, Ribeira, Santa Maria da Feira, Santiago de Compostela e Vila Real. Cada grupo irá acompañado por dous profesores e un técnico do concello.
Os intercambios escolares do Eixo Atlántico pretenden que os estudantes sexan conscientes da importancia de vivir nun municipio integrante do Eixo Atlántico e de formar parte da Eurorrexión, así como promover a realización de experiencias didácticas que potencien o uso do municipio como recurso educador.
Os participantes traballarán durante o curso coa Guía Didáctica, un informe visual co que se pretende mostrar aos nenos e as nenas da Eurorrexión todas as cidades que compoñen o Eixo Atlántico do que forman parte. Pode ver nesta ligazón a Guía Didáctica do Eixo Atlântico.
Este programa foi unha iniciativa do Eixo Atlántico que comezou hai máis de 20 anos e que se retomou en 2018 tras a suxestión dos municipios de Vila Real e Santiago de Compostela. A actividade desenvolveuse no curso lectivo 2018-19 e dado ao éxito da mesma decidiuse continuar o curso seguinte, aínda que que coa pandemia non foi posible até agora.
