David Pontes, do Diario Público, e Xoán V. Mao abordaron temas de actualidade na Eurorrexión como a liberalización do sector do transporte por ferrocarril
O director adxunto do Diario Público, David Pontes, e o secretario xeral do Eixo Atlántico, Xoán Vázquez Mao, participaron no programa mensual sobre a Eurorrexión que se emite a través de Radio Vigo e Localia Televigo, así como Antena Minho, para a área de Braga.
A actualidade no que respecta ás infraestruturas ferroviarias co recente anuncio da creación dunha empresa conxunta entre Comboios de Portugal e Renfe, o proxecto de Arriva para explotar a liña A Coruña-Porto ou a necesidade de que se impulse a saída sur de Vigo por parte do Goberno español foron algúns dos asuntos tratados durante o programa.
Ademais, tamén houbo tempo para analizar a situación en Portugal tras os grandes incendios de hai un ano e de poñer en valor a nova Guía Túrística do Eixo Atlántico, “Patrimonio Natural, Paraíso Terreal”, que se distribuirá en papel coa prensa galega e portuguesa a principios do mes de outubro e estará dispoñible para a súa descarga a través da web do Eixo.