O intercambio realizarase co municipio de Felgueiras, ao que viaxarán 30 rapaces e rapazas de 5º ou 6º de primaria da Coruña
O Concello da Coruña abre hoxe, luns 22 de xaneiro, o prazo de inscrición para o programa "III Intercambio escolar do Eixo Atlántico", dirixido ao alumnado de 5º e 6º de educación primaria procedente de centros públicos do Concello da Coruña. O obxectivo do programa é facilitar o intercambio entre escolares de diferentes municipios do Eixo Atlántico, reforzando o seu coñecemento cultural e os lazos entre os territorios da Eurorrexión.
De acordo coas bases do programa, o grupo de traballo de Educación e Cultura do Eixo Atlántico realizou o sorteo de destinos do programa "Intercambios Escolares. Vivir nos municipios do Eixo Atlántico", resultando que A Coruña realizará no curso 2023/2024 o intercambio co municipio de Felgueiras entre os meses de abril e maio do 2024.
O programa está dirixido a grupos escolares formados por un máximo de 30 participantes que cursen quinto ou sexto curso de primaria nun centro de educación pública do Concello da Coruña.
Os centros educativos que desexen participar deberán achegar a súa solicitude de inscrición mediante a ficha dispoñible na web municipal de Educación antes do vindeiro xoves 1 de febreiro. Posteriormente, deberán realizar unha memoria coa proposta do proxecto de actividades a desenvolver na Coruña co grupo visitante portugués, con prazo máximo do 15 de marzo.
Trátase dun programa de carácter gratuíto, de xeito que os concellos da Coruña e Felgueiras faranse cargo de todos os gastos (desprazamentos, aloxamento e comidas, seguros de viaxe e de responsabilidade civil e acompañamento) e do apoio na organización de vistas e itinerarios de visita. Súmase a outros proxectos educativos impulsados polo Concello da Coruña como 'Idiomas no mundo' ou as Bolsas USA para o libre movemento da mocidade coruñesa na súa etapa formativa.