Luís Domínguez, un dos coordinadores do documento, presentará a primeira axenda urbana transfronteiriza da UE
A Axenda Urbana do Eixo Atlántico preséntase como un exemplo de boa práctica no XXI Encontro de Plans Estratéxicos Urbanos e Territoriais, que se desenvolve hoxe e mañá no Museo Pablo Gargallo, en Zaragoza.
O encargado de explicar o documento elaborado polo Eixo Atlántico será Luís Domínguez, profesor da Universidade de Vigo e un dos coordinadores científicos da que constitúe a primeira axenda urbana transfronteiriza da Unión Europea.
A Axenda Urbana do Eixo Atlántico enfócase como unha estratexia de desenvolvemento urbano coordinado para todas as cidades integradas na asociación, de maneira que avancen todas aínda que cada unha ao seu ritmo e segundo as súas prioridades cara a unha mesma dirección, xerando sinerxías e complementariedades que permitan o desenvolvemento do territorio Galicia-Norte como un todo.
A Eurorrexión Galicia-Norte de Portugal configúrase como a máis dinámica e estable dentro de Europa e constitúe a terceira área urbana da Península Ibérica.
Con todo, esta puxante área atópase con problemas de mobilidade, como é o déficit na rede ferroviaria e a coordinación entre portos e aeroportos ou dificultades no ámbito da política industrial como unha asimétrica ocupación do chan produtivo.
Para pór en práctica a estratexia deseñada, actualmente estase traballando no deseño dun plan de acción que permita a cada cidade adaptar a estratexia global ás súas prioridades particulares. Este plan de acción, que se está traballando en estreita colaboración coas cidades e axentes do territorio, concíbese como un marco de referencia e aspira a ser un instrumento indicativo para as autoridades públicas e a sociedade civil, sen ser imperativo en ningún caso.
O plan de acción articúlase en torno o catro prioridades estratéxicas que recollen e distinguen o cinco eixos establecidos na Axenda Urbana: a cidade do futuro; desenvolvemento e emprego: a Eurorrexión do coñecemento; cohesión territorial e reto demográfico; e espazo eurorrexional.
Sobre o Encontro de Plans Estratéxicos Urbanos e Territoriais
A asociación zaragozana Ebrópolis organiza anualmente o Encontro de Plans Estratéxicos e Territoriais co propósito de intercambiar e compartir experiencias sobre os asuntos de interese relacionados coa planificación estratéxica territorial.
Nesta XXI edición do foro trabállase en dúas perspectivas diferentes. Por unha banda, a articulación dos distintos niveis das axendas urbanas no marco dos Obxectivos de Desenvolvemento Sustentable e a axenda marcada en Habitat III. Polo outro, a necesaria visión desde a planificación estratéxica urbana da mirada cara a dentro das urbes, da problemática dos barrios da cidade consolidada: turismo, xentrificación, perda de tecido comercial, envellecemento, degradación, etc.
