As actividades centrais da XXI edición da Festa do Botelo celebraranse o sábado, 21 de xaneiro, a partir das 12,00 horas
As entradas para a comida, que terá lugar no Pavillón Polideportivo a partir das 14,30 horas, poranse a venda o sábado 14, a partir das 9 da mañá, no Teatro Lauro Olmo. Serán en total 1.150 entradas, que este ano terán un prezo de 20 euros.
O programa de actividades arranca o xoves 19, coa proxeción da película “O corpo aberto”, no Teatro Lauro Olmo. Haberá tres sesións, ás 17, 19 e 21 horas. O venres 20, ás 21, 00 horas no mesmo escenario, ofrécese a representación da obra de teatro “Pirolíticos”, da compañía “Mofa e Befa”.
O día 21, as actividades comezan ás 12 da mañá co acto do pregón e entrega da mención de honra, no Teatro Lauro Olmo. Estará presentado pola actriz Fátima Delgado, e a mención de honra será para Adela Pombo Fernández, cociñeira xubilada do CEIP Condesa de Fenosa.
O actor Federico Pérez Rey “Fede”, será o encargado de dar lectura ao pregón deste ano, que rematará coa actuación do Orfeón Valdeorrés.
Antes da comida, no pasacalles entre o Teatro Lauro Olmo e o Pavillón de Calabagueiros, e durante a mesma, 7 grupos musicais porán animación a esta festa. As foliadas e cantos de taberna, no casco vello e no Malecón, protagonizadas polos mesmos grupos, terán lugar desde as 19,00 horas.
O concerto da recoñecida artista María do Ceo pechará os actos desta festa. Será o domingo, día 22, ás 20,00 horas no Teatro Lauro Olmo.