A Fundación Municipal de Deportes dará o 10 de outubro o pistoletazo de saída ás actividades deportivas de inverno para o público adulto. Este curso serán 1.684 usuarios os que participen nas nove modalidades deportivas que imparte o organismo municipal que este ano volveu a elevar o número de prazas en pilates, a máis demandada, e que creou a nova opción de circuitraining para persoas máis xóvenes e activas. Ningunha persoa inscrita quedará sen praza.
A actividade con maior número de inscricións foi un ano máis ximnasia de mantemento, que contou con 431 inscricións. Por detrás, pero no grupo das preferidas por parte dos usuarios, situáronse con máis de 200 inscricións, pilates (283), ioga (243) e ximnasia acuática e piscina (206).
A función da Fundación de Deportes de Vilagarcía é promover e facilitar a práctica de actividade física entre todos os veciños do municipio, de aí que, ano tras ano se vaia implementando o número de prazas e mesmo de modalidades a impartir, co obxecto de atender toda a demanda e as preferencias dos usuarios. Por iso, a Fundación non deixará a ninguén sen praza pese ao elevado número de usuarios dalgúns grupos.