O futuro das cidades despois da crise centra o debate dos alcaldes na Coruña

O Eixo Atlántico celebrou na sede de Afundación da Coruña o Foro de Lanzamento do Plan de Acción da Axenda Urbana

O obxectivo da cohesión social, a sustentabilidade e a necesaria colaboración entre as cidades centrou o debate entre os alcaldes da Coruña, Barcelona, O Barco de Valdeorras, Braga, *Guimarães e Plasencia que protagonizaron un debate sobre as  Novas Políticas Urbanas-

Durante este debate, moderado polo secretario xeral do Eixo, Xoán Vázquez Mao, Ada Colau destacou a importancia da cooperación entre as cidades. “Temos que estar en contacto permanente unas con outras e reflexionando sobre o mundo global no que estamos, necesitamos que as cidades estean conectadas porque nos vai o futuro niso”, indicou.

En referencia ao turismo, Colau explicou que Barcelona é unha cidade aberta e que quere ao turista, pero que actualmente se atopou co fenómeno do turismo masificado que pon en perigo o propio futuro da cidade, motivo polo que se regulou.

Alfredo García indicou que o obxectivo máis importante é lograr cidades sustentables socialmente. O alcalde de O Barco destacou no seu concello desgraciadamente non teñen o problema do turismo, pero é unha cidade que sempre está chea de xente, chea de vida, grazas en parte ás iniciativas reordenación do tráfico ou a rehabilitación de vivendas realizada. “Hai que aprender e a vivir sen coches”, indicou.

Fernando Pizarro, pola súa banda, explicou  a súa experiencia á fronte do Concello de Plasencia, onde se apostou polo turismo sustentable e a enerxía renovable. Destacou como lograron un superávit económico grazas ao turismo que visita o centro histórico  e que permitiu seguir rehabilitando a zona e que os mozos poidan acceder á vivenda.

Xulio Ferreiro, alcalde da Coruña, coincidiu en que o desafío é facer sustentables as nosas cidades no futuro. E nese sentido defendeu a necesidade de asegurar uns ingresos mínimos de renda para os cidadáns. Tamén se referiu a os problemas de mobilidade  e ao obxectivo de quitar os coches da zona vella e crear un sistema de transporte público eficiente, todo isto pensado en clave metropolitana.

Ricardo Rio, alcalde de Braga, pola súa banda, explicou exemplos concretos no ámbito social desenvolvidos en Braga, como é o caso da atención dental xeneralizada. E apostou pola reorganización na distribución dos recursos, como é o caso dalgúns impostos porque con esta reorganización axudará a implementación dos criterios da Axenda Urbana.

Adelina Pinto, vice-presidenta da Cámara de Guimarães, resaltou o carácter histórico e cultural da súa cidade. Asegurou que en canto ao turismo teñen unha dobre vertente: un turismo masificado pola súa proximidade a Porto, pero tamén un turismo máis informado que se aloxa en hoteis e visita os seus monumentos. Neste sentido, o obxectivo desta cidade é reordenar este turismo masivo, así como mellorar a mobilidade en canto ao uso do transporte público ou a bicicleta.

 Sesión inaugural

Durante a sesión inaugural Sonia Hernández, sudirectora xeral adxunta do Ministerio de Fomento, detallou a Axenda Urbana Española, enmarcada na Axenda Urbana Europea  e a Axenda Urbana Internacional, que están á súa vez baixo o paraugas da Axenda de Desenvolvemento Sustentable ou Axenda 2030. Hernández presentou a Axenda Urbana española como un marco estratéxico que debe orientar o sentido das políticas públicas e tamén das accións privadas para conseguir os obxectivos sociais, ambientais e económicos da sustentabilidade.

Pola súa banda María Dores Ortiz, subdirectora xeral de Desenvolvemento Urbano, do Ministerio de Facenda, falou do financiamento necesario para para o Desenvolvemento Urbano, como é o caso das DUSI, para municipios de máis de 20.000 habitantes. Ortiz explicou que os proxectos cofinanciados con Fondos Feder deben responder a 4  obxectivos:

1. 1. Fomento da Administración Electrónica Local e as Smart Cities (OT2).
2. 2. Fomento de estratexias de redución do carbono para zonas urbanas (OT4) (obrigatorio)
3. 3. Acción para mellorar a contorna urbana, incluíndo a posta en valor do Patrimonio Cultural e a mellora do Medio Ambiente Urbano (OT6)
4. 4. Apoio á rexeneración física, económica e social das zonas urbanas desfavorecidas (OT9) (obrigatorio)

Pola súa banda, Andoni Aldekoa,  experto da Axenda Urbana, protagonizou a segunda mesa da xornada e falou das “cidades hub”, como nodos de desenvolvemento sustentable, así como da  importancia de buscar eixos comúns de desenvolvemento, elementos de autenticidade do territorio que permitan situar cada territorio en base a elementos comúns e unir sinerxías.

A axenda urbana e o plan de acción

O Eixo Atlántico traballa nunha Axenda Urbana para o Sistema Urbano da Eurorrexión, a primeira transfronteiriza da UE. Este documento enfócase como unha estratexia de desenvolvemento urbano coordinado para todas as cidades da Eurorrexión, de maneira que avancen todas  aínda que cada unha ao seu ritmo e segundo as súas prioridades  cara a unha mesma dirección, xerando sinerxías e complementariedades que permitan o desenvolvemento do territorio Galicia-Norte como un todo.

O foro celebrado hoxe constitúe a posta en marcha efectiva da axenda urbana, que xa foi entregada na Comisión Europea, e que agora inicia o seu despegamento coa presentación do plan de acción ante as cidades integradas no Eixo e a cidadanía.

A Eurorrexión Galicia-Norte de Portugal configúrase como a máis dinámica e estable dentro de Europa, un dinamismo que sen dúbida contribuíu ao seu fortalecemento pero tamén xerou unha serie de dificultades para o desenvolvemento desta eurorrexión, que constitúe a terceira área urbana da Península Ibérica.

Esta puxante área atópase con problemas de mobilidade, como é o déficit na rede ferroviaria e a coordinación entre portos e aeroportos ou dificultades no ámbito da política industrial como unha asimétrica ocupación do chan produtivo.

O plan de acción concíbese como un marco de referencia dotado de instrumentos válidos para conseguir os obxectivos acordados. Aspira a ser indicativo para as autoridades públicas e a sociedade civil, sen ser imperativo en ningún caso. Isto só será posible coa implicación activa de todos os actores na súa elaboración, na súa xestión e no seu seguimento. O seu horizonte espacial vai ser o conxunto da Eurorrexión e, moi especialmente, o seu sistema urbano. Pretende ser un instrumento orientador de políticas públicas, nunca un receitario homoxéneo e uniformador.

O plan de acción articúlase en torno o catro prioridades estratéxicas que recollen e distinguen o cinco eixos establecidos na Axenda Urbana: a cidade do futuro; desenvolvemento e emprego: a Eurorrexión do coñecemento; cohesión territorial e reto demográfico; e espazo eurorregional.

GALERÍA DE FOTOS