O secretario xeral do Eixo Atlántico reclama un pacto político sobre as infraestruturas de Lugo e critica décadas de atrasos e confrontación entre as administracións
O secretario xeral do Eixo Atlántico, Xoán Vázquez Mao, interviu en SER Lugo para analizar a situación das infraestruturas da provincia e reclamar un cambio na forma de abordar os grandes proxectos pendentes. Vázquez Mao defendeu a necesidade de sacar as infraestruturas da confrontación política e reclamou un acordo entre as principais forzas políticas galegas para establecer prioridades e defendelas conxuntamente ante o Goberno central. "O que non se consegue nunca é que haxa un acordo marco entre os grandes partidos para deixar fóra da confrontación as infraestruturas e para conseguir que en Madrid se faga caso", afirmou. O secretario xeral do Eixo Atlántico considera que esta falta de acordo está a prexudicar especialmente territorios como Lugo, que parten dunha posición de menor peso demográfico e político.
"O problema de Lugo é un problema histórico que primeiro se basea no problema de falta de peso político pola falta de poboación", explicou. "Non teñen xente, polo tanto, teñen menos votos, teñen menos deputados e menos peso político".
Ao analizar a relación entre Galicia e o Goberno central, Vázquez Mao puxo como referencia a etapa de Manuel Fraga como presidente da Xunta e a súa capacidade para chegar a acordos con gobernos de diferente signo político. "O único presidente da Xunta que eu lembro que foi quen de poñerse de acordo en Madrid con Felipe González, de ideoloxías distintas", afirmou.
E engadiu: "Recoñezo que, como presidente de Galicia, foi quen de poñerse de acordo, cousa que estes son incapaces de facer".
Vázquez Mao considera que esa capacidade de interlocución política é necesaria tamén na actualidade e cuestionou a dinámica de confrontación permanente entre os diferentes niveis de goberno. Ao longo da entrevista, o secretario xeral do Eixo Atlántico referiuse aos sucesivos gobernos e ás responsabilidades acumuladas ao longo de décadas. Mencionou os presidentes da Xunta Alberto Núñez Feijóo e Alfonso Rueda, así como os anteriores presidentes e gobernos estatais, para subliñar que os problemas de infraestruturas de Lugo non son recentes nin poden atribuírse exclusivamente a unha administración.
Tamén se referiu expresamente ao actual ministro de Transportes, Óscar Puente, e reclamou que os representantes políticos galegos exerzan unha maior presión política para conseguir compromisos concretos por parte do Estado. "Por que non lle presentamos ao Goberno central con apoio do Partido Socialista de Galicia un pacto de Estado a nivel das infraestruturas de Lugo?", cuestionou.
"Unha infraestrutura non é un capricho"
Un dos principais asuntos abordados durante a entrevista foi a estación intermodal de Lugo, un proxecto que Vázquez Mao considera estratéxico para a cidade e polo que o Eixo Atlántico leva anos traballando. O secretario xeral do Eixo Atlántico reivindicou o traballo desenvolvido durante anos para conseguir que a Intermodal fose unha realidade e considerou necesario recoñecer o esforzo realizado por diferentes responsables políticos e institucións.
"O primeiro que temos é que celebrar que a Intermodal se achegue a ser unha realidade", afirmou. Ao mesmo tempo, criticou os novos atrasos derivados de cuestións administrativas e burocráticas e advertiu de que estes problemas forman parte dunha dinámica que se repite demasiado frecuentemente nas grandes infraestruturas.
"Desgraciadamente parece que temos, en fin, a maldición de que sempre cando temos que facer unha inauguración dun tema de AVE, dun tema de estación, dun tema de CIDE, por exemplo, en Vigo, aparecen dous problemas", afirmou. Para Vázquez Mao, a importancia da Intermodal transcende a propia infraestrutura ferroviaria.
"Unha infraestrutura non é un capricho. Unha infraestrutura é un elemento de desenvolvemento", sinalou. Neste sentido, explicou que unha infraestrutura deste tipo pode actuar como motor da transformación urbana da cidade, xerando novos barrios, equipamentos e servizos ao seu redor.
A-54, A-74, A-6 e conexións coa Mariña
O secretario xeral do Eixo Atlántico advertiu de que a situación de Lugo non se limita á Intermodal. Durante a entrevista repasou unha longa lista de actuacións pendentes, entre elas a A-54, a A-74, a A-6, as conexións con Ourense e as infraestruturas da Mariña.
"A lista é tan longa, cando falamos de infraestruturas, cando falamos da provincia de Lugo, xa non só falamos de Intermodal, A-54, A-74, A-6 agora en obras, esa autovía con Ourense...", sinalou. Vázquez Mao tamén cuestionou a falta de información sobre determinados proxectos e reclamou que as administracións expliquen aos cidadáns o estado real das actuacións e os motivos dos atrasos. "A primeira regra de calquera Goberno popular ou socialista que se alternan no Goberno é dar explicacións públicas aos cidadáns", afirmou.
Un pacto para as infraestruturas de Lugo
A intervención de Xoán Vázquez Mao concluíu cunha reclamación de maior coordinación entre as diferentes administracións e forzas políticas para defender os intereses da provincia. O secretario xeral do Eixo Atlántico considera que Lugo necesita unha estratexia propia de infraestruturas, consensuada politicamente e capaz de establecer prioridades claras para trasladalas ao Goberno central. "Aquí temos unhas prioridades neste país que chamamos Galicia", afirmou, defendendo que esas prioridades deben ser acordadas e defendidas conxuntamente.
Para o Eixo Atlántico, a situación de Lugo evidencia a necesidade de superar unha dinámica de confrontación que, ao longo de décadas, non permitiu resolver problemas estruturais de conectividade e que continúa condicionando o desenvolvemento da provincia.