O estudantado da Escola Básica D. Manuel Faria e Sousa de Felgueiras está a desfrutar estes días da súa estadía en Ribeira xunto ao alumnado de 6º curso do CEIP de Olveira, no marco do programa de intercambio escolar promovido polo Eixo Atlántico .
A rapazada foi recibida pola concelleira de Educación de Ribeira, Nucha Brión. Durante a xornada inaugural visitaron a exposición da Bienal de Pintura do Eixo Atlántico no Centro Cultural Lustres Rivas, gozaron de tempo de lecer pola cidade, coñeceron o Museo Municipal e participaron nun paseo comentado polo centro urbano arredor da arte urbana.
Descubrindo o litoral galego e as tradicións locais
Na xornada do xoves 14, o grupo desprázase ao Parque Natural de Corrubedo e lagoas de Carregal e Vixán para visitar o Centro de Interpretación do Ecosistema Litoral de Galicia (CIELGA) e experimentar o novo visualizador virtual do ecosistema litoral. A continuación, participan na tradicional Festa dos Maios en Olveira antes de emprender o regreso a Portugal pola tarde.
Un intercambio que reforza a convivencia educativa
Na semana anterior foi a quenda do alumnado ribeirense de viaxar a terras lusas, onde puideron coñecer de preto o peso da industria do calzado na zona, así como visitar espazos de interese cultural como a Vila Romana de Sendim.
Este conxunto de actividades favorece a convivencia, o coñecemento mutuo e o intercambio cultural entre comunidades educativas de distintos territorios, reforzando os vínculos que promove o Eixo Atlántico a través dos seus programas educativos.